اسلام آباد۔25ستمبر (اے بی سی):بے نظیر انکم سپورٹ پروگرام (بی آئی ایس پی) کے 5 ہزار سے زائد مستحقین اور ان کے اہل خانہ سندھ میں بے نظیر ہنرمند پروگرام کے تحت مختلف شعبوں میں فنی و پیشہ ورانہ تربیت حاصل کر رہے ہیں۔ویلتھ پاکستان کو دستیاب دستاویزات کے مطابق یہ تربیت بے نظیر بھٹو شہید ہیومن ریسورس ریسرچ اینڈ ڈویلپمنٹ بورڈ کے اشتراک سے فراہم کی جا رہی ہے۔خواتین مستحقین اور ان کے اہل خانہ کو بااختیار بنانے کے لیے شروع کیے گئے اس پروگرام کے تحت مارکیٹ کی ضروریات سے ہم آہنگ فنی اور پیشہ ورانہ تربیت فراہم کی جاتی ہے تاکہ پاکستان اور بیرون ملک پائیدار روزگار اور آمدن کے مواقع بہتر بنائے جا سکیں۔
بے نظیر ہنرمند پروگرام کے تحت صحت، اطلاعاتی ٹیکنالوجی، ہوٹل و مہمان نوازی، تعمیرات، آرائش و زیبائش، ملبوسات اور ٹیکسٹائل سمیت اہم شعبوں میں باقاعدہ تربیت فراہم کی جاتی ہے۔ دور دراز علاقوں کے ہنرمندوں کے لیے غیر رسمی تربیت کے مواقع بھی فراہم کیے جاتے ہیں تاکہ روایتی دستکاری کو محفوظ رکھنے کے ساتھ ڈیجیٹل مارکیٹنگ کی مہارتوں کے ذریعے ان کی منڈیوں تک رسائی بہتر بنائی جا سکے۔جون 2025 میں صدر پاکستان کی جانب سے پروگرام کے افتتاح کے بعد سے چھ ماہ کے تربیتی پروگراموں کے لیے 49 ہزار سے زائد امیدوار بے نظیر ہنرمند پروگرام کے پورٹل پر رجسٹریشن کرا چکے ہیں، جن میں تقریباً 75 فیصد خواتین ہیں۔
بی آئی ایس پی نے پروگرام پر عمل درآمد اور طلب کے مطابق پیشہ ورانہ تربیت کی فراہمی کے لیے مختلف اداروں کے ساتھ شراکت داریاں قائم کی ہیں۔عمل درآمد، رسائی اور طویل مدتی پائیداری کو مضبوط بنانے کے لیے نیشنل ووکیشنل اینڈ ٹیکنیکل ٹریننگ کمیشن، بے نظیر بھٹو شہید ہیومن ریسورس ریسرچ اینڈ ڈویلپمنٹ بورڈ، پاکستان پاورٹی ایلیویشن فنڈ، پنجاب سکلز ڈویلپمنٹ فنڈ اور لوک ورثہ کے ساتھ مفاہمتی یادداشتوں پر دستخط کیے گئے ہیں۔
بی آئی ایس پی بورڈ نے دسمبر 2025 میں اپنے 66ویں اجلاس میں بے نظیر ہنرمند پروگرام کی اصولی منظوری دی تھی جبکہ ٹیکنیکل ڈیزائن کمیٹی نے رواں سال اگست میں اپنے 19ویں اجلاس میں پروگرام کے ڈیزائن کی منظوری دی۔پروگرام کا مقصد شراکت دار اداروں کی مہارت سے فائدہ اٹھاتے ہوئے اعلیٰ معیار اور مارکیٹ کی طلب سے ہم آہنگ فنی و پیشہ ورانہ تربیت فراہم کرنا اور بی آئی ایس پی مستحقین اور ان کے اہل خانہ کے لیے روزگار اور پائیدار ذرائع آمدن کے مواقع کو بہتر بنانا ہے۔